“ਅਸੀਂ ਸੁਰੱਖਿਅਤ ਨਹੀਂ ਹਾਂ। ਮੈਂ ਸੌਂ ਵੀ ਨਹੀਂ ਸਕਦਾ।” – ਨੋਵਾ ਸਕੋਸ਼ੀਆ ਵਿੱਚ ਪੰਜਾਬੀ ਨੌਜਵਾਨ ਦੇ ਕਤਲ ਤੋਂ ਬਾਅਦ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ‘ਚ ਸਹਿਮ




ਨੋਵਾ ਸਕੋਸ਼ੀਆ ਵਿੱਚ ਪੰਜਾਬੀ ਨੌਜਵਾਨ ਦਾ ਚਾਕੂ ਮਾਰਨ ਕੇ ਕਤਲ ਹੋਣ ਕਾਰਨ ਪੰਜਾਬੀ ਭਾਈਚਾਰਾ ਸਦਮੇ ਵਿਚ ਹੈ।

ਇਸ ਸਬੰਧੀ ਪੁਲਿਸ ਡਿਪਟੀ ਮੁਖੀ ਨੇ ਸੋਮਵਾਰ ਨੂੰ ਕਿਹਾ ਕਿ ਟਰੂਰੋ, ਐਨਐਸ ਵਿੱਚ ਪੁਲਿਸ ਹੁਣ ਇਸ ਮੌਤ ਨੂੰ ਇੱਕ ਹੱਤਿਆ ਵਜੋਂ ਮੰਨ ਰਹੀ ਹੈ।

ਡਿਪਟੀ ਚੀਫ ਰੌਬਰਟ ਹਰਨ ਨੇ ਦੱਸਿਆ ਕਿ ਐਤਵਾਰ ਤੜਕੇ ਇੱਕ 23 ਸਾਲਾ ਵਿਅਕਤੀ ਰੋਬੀ ਸਟਰੀਟ ਅਪਾਰਟਮੈਂਟ ਬਿਲਡਿੰਗ ਵਿੱਚ ਮ੍ਰਿਤਕ ਪਾਇਆ ਗਿਆ।

ਹਰਨ ਨੇ ਕਿਹਾ, “ਜਾਂਚ ਜਾਰੀ ਹੈ ਅਤੇ ਇਸ ਸਮੇਂ ਆਮ ਲੋਕਾਂ ਲਈ ਕੋਈ ਖਤਰਾ ਨਹੀਂ ਹੈ।

ਪੁਲਿਸ ਨੇ ਪੀੜਤ ਦਾ ਨਾਂ ਨਹੀਂ ਦੱਸਿਆ ਅਤੇ ਨਾ ਹੀ ਕਿਸੇ ਸ਼ੱਕੀ ਬਾਰੇ ਜਾਣਕਾਰੀ ਦਿੱਤੀ ਹੈ।

ਟਰੂਰੋ ਪੁਲਿਸ ਸੇਵਾ ਨੇ ਕਿਹਾ ਕਿ ਉਹ ਅੱਜ ਸਵੇਰੇ ਇੱਕ ਅਪਡੇਟ ਦੇਣਗੇ।

ਪੀੜਤ 2017 ਵਿੱਚ ਕੈਨੇਡਾ ਆਇਆ ਸੀ

ਪੁਲਿਸ ਨੇ ਪੀੜਤ ਦਾ ਨਾਂ ਨਹੀਂ ਦੱਸਿਆ, ਪਰ ਪੀੜਤ ਦੀ ਪਛਾਣ ਪ੍ਰਭਜੋਤ ਸਿੰਘ ਵਜੋਂ ਹੋਈ ਹੈ, ਜੋ 2017 ਵਿੱਚ ਪੜ੍ਹਾਈ ਲਈ ਭਾਰਤ ਤੋਂ ਕੈਨੇਡਾ ਆਇਆ ਸੀ।

ਨਿੱਜੀ ਨਿਊਜ਼ ਏਜੰਸੀ ਨਾਲ ਗੱਲ ਕਰਦਿਆਂ ਜਤਿੰਦਰ ਕੁਮਾਰਦੀਪ ਨੇ ਕਿਹਾ ਕਿ “ਉਹ ਨਿਰਦੋਸ਼ ਨੌਜਵਾਨ ਸੀ ਜੋ ਆਪਣੀ ਨੌਕਰੀ ਤੋਂ ਵਾਪਸ ਆ ਰਿਹਾ ਸੀ। ਉਹ ਟੈਕਸੀ ਚਲਾਉਂਦਾ ਸੀ,” ਉਸਨੇ ਕਿਹਾ।

ਕੁਮਾਰਦੀਪ ਨੇ ਕਿਹਾ ਕਿ ਜਦੋਂ ਤੋਂ ਉਸ ਦੇ ਦੋਸਤ ਦੀ ਮੌਤ ਹੋਈ ਹੈ ਉਹ ਸੁੱਤਾ ਨਹੀਂ ਹੈ। ਕੁਮਾਰਦੀਪ ਨੇ ਕਿਹਾ ਕਿ ਟਰੂਰੋ ਵਿੱਚ ਕੁਝ ਕੁ ਹੀ ਅੰਤਰਰਾਸ਼ਟਰੀ ਵਿਦਿਆਰਥੀ ਹਨ, ਇਸ ਲਈ ਜ਼ਿਆਦਾਤਰ ਇੱਕ ਦੂਜੇ ਨੂੰ ਜਾਣਦੇ ਹਨ। ਉਹ ਦੋਵੇਂ ਪੰਜਾਬ, ਭਾਰਤ ਤੋਂ ਹਨ, ਅਤੇ ਨੋਵਾ ਸਕੋਸ਼ੀਆ ਵਿੱਚ ਰਹਿੰਦੇ ਹਨ।

“ਅਸੀਂ ਬਹੁਤ ਅਸੁਰੱਖਿਅਤ ਮਹਿਸੂਸ ਕਰਦੇ ਹਾਂ,” ਉਸਨੇ ਕਿਹਾ।

ਉਨ੍ਹਾਂ ਕਿਹਾ ਕਿ ਕਸਬੇ ਦਾ ਛੋਟਾ ਭਾਰਤੀ ਭਾਈਚਾਰਾ ਚੁੱਪ ਰਹਿਣ ਅਤੇ ਮੁਸੀਬਤ ਤੋਂ ਦੂਰ ਰਹਿਣ ਦੀ ਕੋਸ਼ਿਸ਼ ਕਰਦਾ ਹੈ।

ਉਨ੍ਹਾਂ ਕਿਹਾ, “ਅਸੀਂ ਲੋਕ ਵੀ ਹਾਂ। ਬ੍ਰਾਊਨ ਲੋਕ ਵੀ ਮਹੱਤਵ ਰੱਖਦੇ ਹਨ। ਅਸੀਂ ਇਸ ਦੇਸ਼ ਨੂੰ ਆਪਣਾ ਸਭ ਕੁਝ ਦੇ ਰਹੇ ਹਾਂ।” “ਇਹ ਸਾਡੇ ਨਾਲ ਕਿਉਂ ਹੋ ਰਿਹਾ ਹੈ?”

ਉਸਨੇ ਆਪਣੇ ਦੋਸਤ ਦੀ ਮ੍ਰਿਤਕ ਦੇਹ ਨੂੰ ਭਾਰਤ ਭੇਜਣ ਵਿੱਚ ਸਹਾਇਤਾ ਲਈ ਇੱਕ ਆਨਲਾਈਨ ਫੰਡਰੇਜ਼ਰ ਬਣਾਇਆ, ਤਾਂ ਜੋ ਆਖ਼ਰੀ ਵਿਰ ਉਸਦੇ ਮਾਪੇ ਉਸਨੂੰ ਦੇਖ ਸਕਣ।

ਅਗਮਪਾਲ ਸਿੰਘ ਨੇ ਕਿਹਾ ਕਿ ਉਸ ਦਾ ਦੋਸਤ ਇੱਕ ਚੰਗਾ ਵਿਅਕਤੀ ਸੀ।

“ਕੁਝ ਵੀ ਲੁੱਟਿਆ ਨਹੀਂ ਗਿਆ। ਇੱਥੋਂ ਤੱਕ ਕਿ ਉਸਦਾ ਫੋਨ ਵੀ ਉਸਦੀ ਜੇਬ ਵਿੱਚ ਸੀ,” ਸਿੰਘ ਨੇ ਕਿਹਾ। “ਸਾਨੂੰ ਨਹੀਂ ਪਤਾ ਕਿ ਇਹ ਕਿਉਂ ਹੋਇਆ।”

ਉਸ ਨੇ ਕਿਹਾ ਕਿ ਉਸ ਦੇ ਦੋਸਤ ਦਾ ਕੋਈ ਦੁਸ਼ਮਣ ਨਹੀਂ ਸੀ।

ਸਿੰਘ ਨੇ ਕਿਹਾ, “ਉਹ ਬਹੁਤ ਹੀ ਨਿਰਦੋਸ਼ ਵਿਅਕਤੀ ਸੀ। ਕਦੇ ਬੁਰੀ ਸੰਗਤ ਨਹੀਂ ਕੀਤੀ, ਕਦੇ ਸਿਗਰਟ ਨਹੀਂ ਪੀਤੀ, ਕਦੇ ਦਾਰੂ ਪੀਤੀ ਨਹੀਂ ਸੀ, ਉਸਨੇ ਨਸ਼ਿਆਂ ਨੂੰ ਨਹੀਂ ਛੂਹਿਆ ਸੀ। ਉਸਦੇ ਇੱਥੇ ਸਿਰਫ ਕੁਝ ਦੋਸਤ ਸਨ,” ਸਿੰਘ ਨੇ ਕਿਹਾ। “ਉਹ ਉਨ੍ਹਾਂ ਲੋਕਾਂ ਨਾਲ ਗੱਲ ਨਹੀਂ ਕਰਦਾ ਸੀ ਜਿਨ੍ਹਾਂ ਨੂੰ ਉਹ ਨਹੀਂ ਜਾਣਦਾ ਸੀ। ਮੈਨੂੰ ਲਗਦਾ ਹੈ ਕਿ ਇਹ ਨਫ਼ਰਤੀ ਅਪਰਾਧ ਹੋ ਸਕਦਾ ਹੈ।”

ਉਨ੍ਹਾਂ ਕਿਹਾ ਕਿ ਸਿੰਘ ਨੇ ਆਪਣੀ ਪੜ੍ਹਾਈ ਪੂਰੀ ਕਰ ਲਈ ਸੀ ਅਤੇ ਉਹ ਵਰਕ ਵੀਜ਼ੇ ‘ਤੇ ਸੀ ਅਤੇ ਕੈਨੇਡਾ ਵਿੱਚ ਸਥਾਈ ਨਿਵਾਸ/ਪੀਆਰ ਲਈ ਅਰਜ਼ੀ ਦੇ ਰਿਹਾ ਸੀ।

“ਅਤੇ ਫਿਰ ਇਹ ਚੀਜ਼ ਵਾਪਰਦੀ ਹੈ, ਜਿਸਨੇ ਉਸਦੇ ਪਰਿਵਾਰ ਅਤੇ ਸਾਨੂੰ ਵੀ ਪੂਰੀ ਤਰ੍ਹਾਂ ਤਬਾਹ ਕਰ ਦਿੱਤਾ ਹੈ।”

ਅਗਮਪਾਲ ਸਿੰਘ ਨੇ ਕਿਹਾ ਕਿ ਉਨ੍ਹਾਂ ਨੂੰ ਭਰੋਸਾ ਹੈ ਕਿ ਪੁਲਿਸ ਉਨ੍ਹਾਂ ਦੇ ਦੋਸਤ ਨੂੰ ਨਿਆਂ ਦਿਵਾਏਗੀ।

“ਅਸੀਂ ਚੰਗੇ ਭਵਿੱਖ ਲਈ ਇਸ ਦੇਸ਼ ਵਿੱਚ ਆ ਰਹੇ ਹਾਂ,” ਉਸਨੇ ਕਿਹਾ। “ਅਸੀਂ ਸੁਰੱਖਿਅਤ ਨਹੀਂ ਹਾਂ। ਮੈਂ ਸੌਂ ਵੀ ਨਹੀਂ ਸਕਦਾ।”